La ferata

1.
Śën van sun la ferata
te nosta bela val;
vintmile rusc l’à fata
ruvei caprò al infal;
l fova perjunieres
furnii tan da stracion
che duc ch’i puere tieres
fajova cumpascion.

2.
L ann chidesc de setëmber
ai riesc tacà a la fé,
y bele de dezëmber
minovi d‘ la finé;
ma nveze l’ ai fineda
l ann sëidesc de fauré
y dopro cumededa
che la va śën bën assé.

3.
A Tluses sënten ite
comot te n bel vagon
y pea sëuraite
a pèr de Solaion;
po‘ ite te Gherdëina
y propi nchin te Plan,
ma l fuermon che nes mëina,
ne n’auden mei stlefan.

4.
Zachei nveze scibla
y sofla mé termënt,
po‘ gord’la su na nibla
de fum che fej spavënt.
Mo n cich, po‘ pëi’la via,
na bela gran mascin,
y tira do sciche nia,
vagons pesoc defin.

5.
A Tluses pëi’la via
y vën n iede ju,
po‘ storjela mé sotvia
y vën dal’autra su,
po‘ s’auzela n puech al iede
y passa n puent turont,
de se temëi n’an drë de
che la va tan bel mpont.

6.
Po‘ fir’la da n busc ite
petan n cich segur,
che jënt ne se ndebite
sce l vën te n iede scur.
Ma l cich senifichea
per auter ënghe mo,
che chëi ch‘ iló furnea
dëss‘ stlù i vieresc pro.

7.
L fum scenó unissa
dut ite dai balcons,
y nchina che l se n jissa,
ce puz te ch’i vagons!
Mé bon ch’ la ne durëssa
gran plu de mez menut,
scenó nes cuinëssa
dopro na pert mo giut.

8.
Son bel‘ inò dedora,
cialëd‘ ma n pue‘ ncantëur,
che po‘ cajù sotora
udrëis n feter lëur.
Dlavia vëijen Jevun,
nëus duc l cunescion,
y suvier po‘ receven
de vista dut Renon.

9.
A Santa Catarina
ruvons te vint menuc,
chi ie pa che ndevina
i luesc che n vëiga duc.
Sce un po‘ cumpedëssa
i ciamps ch‘ on udù,
mëti pën che l dijëssa
doimile o gor deplù.

10.
Dlavia iel Taguses,
dedite San Michiel,
tlaite do ch’i bujes
se ërj Saslonch al ciel.
Tlajù sotite cuca
a luesc tlo su l stradon,
ulache n va a Pruca
y passa l Derjon.

11.
La Bierhaus ie tlaite,
ulache duc tlamon
a unì da Pruca ite
a pe o sce furnon.
Śën passen a S. Piere,
ce fetri bur bujons,
merë no che n fire
mo gor te vel purons.

12.
Cialëde, śën se gëura
Gherdëina a mumënc,
ulache n vën daniëura
dalonc caprò cuntënc.
Passon mo a Puntives,
po‘ sons a Urtijëi,
tlo iel de bela rives
y n drë bel luech da udëi.

13.
Y śën sun la ferata
passons per la val,
che l pèr che la garata
de fé tres ite n bal;
che tan de bela rodes
y raides fejela for,
a uni sor‘ de modes
te cër‘ luesc po‘ gor.

14.
La n fej tl prim na bela
dal Fill ala stazion,
po‘ sëura Zitadela
mo n drë bel cumedon.
Po‘ fërm’la n pue‘ y paussa
y lascia desmunté,
ma ëila ënghe daussa
ntant se renfurzé.

15.
Śën vala po‘ dlaite
nchin ta Rumblancon,
po‘ amez Triech ite
ades ndrët po‘ bon,
che bele ta calonia
scumëncela inò a jì
che l pèr che ch’la caronia
messëssa se nciurnì.

16.
Po‘ ruvela ta Dorives
passan ntëur Vastlé,
po‘ ite nchin ta Nives
iel mo n drë bel furné
che da iló ite vala
l plu mé tres ch’i prei,
y pona ënghe sala
de no peté te pei.

17.
Ruvon ta la Madona
tlo possen desmunté,
la dlieja ie depona
daujin sce n uel tlamé.
Sc’nó van mo nchin ta Frata
y te n mumënt sun Plan,
po‘ ora dla ferata
cun si fagoc tla man.

18.
Cun l tëmp sperons jirala
eletrich flux y flix;
y po‘ ne peterala
plu mei ch’i fetri cics.
Mpede ch’i bur scibli
audions’a n bel brunsin,
y cun ch’i sofli tribli
saral po‘ ëngh‘ na fin.

19.
Y no mé la ferata,
ma nce n bel stradon,
da Pruca nchin ta Frata,
ai fat śën bel y bon.
Y l va nce su per Frea
che i auti po‘ furné,
nchina a Curvea
comot y bën assé.

20.
Śën van sun la ferata
te nosta bela val;
vintmile rusc l’à fata,
ruvei caprò al infal,
ntant che rembumbova
i colpes de canons
y ch’i scrapnei petova
ch’i fetri bur stlefons.

21.
Śën van sun la ferata
te nosta bela val;
vintmile rusc l’à fata,
ruvei caprò al infal;
cie mei ne se ndijëssa
ch’i vedli da zacan,
sce ëi nstësc udëssa
tlo ite nsci furnan!