L leva l surëdl

1. Meton pa śën ora de tel cosses da rì
che duc a si moda po‘ se devertì,
ma zënza ufënder no Piere no Paul
no Vo no vel‘ auter nzaul.
2. Y Vo, bona jënt, scuterëis n pue‘ su,
acioche ntendëis ne Ve diji deplù,
che śën scumencions un al iede bel plan
y dut Ve di’rons śën ciantan:

1. Sce l leva l surëdl sun të‘ de Tublà,
ne van ite y ora, sce n va via y ca.
Sce l leva l surëdl sun të‘ de Ciablon,
ne van da dutores, sce n ie san y nton.
2. Sce l leva l surëdl sun të‘ de Ciampac,
ne van sun la colm a jeté n pue‘ al brac.
Sce l leva l surëdl sun cësa de Droc,
po‘ tlamen l tlomper, sce i vieresc ie roc.
3. Sce l leva l surëdl sun cësa da Merch,
se fejen drët pitli sce l ie puecia lerch.
Sce l leva l surëdl sun dut Curijel,
po’n fé de bona prates cun cërn de purcel.
4. Sce l leva l surëdl sun të‘ dl Beché,
po‘ dij feter duc ch’i à n drë bon ciulé.
Sce l leva l surëdl sun të‘ de Petlin,
ie duc nrasei a carté zënza fin.
5. Sce l leva l surëdl sun të‘ de Mureda,
ai scioldi daniëura deguna rededa.
Sce l leva l surëdl sun cësa da Bruel,
po‘ po’n jì a scioldi merë canche n uel.
6. Sce l leva l surëdl sun të‘ da Stlujuc,
ne stan di da ncuei plu a fé vel‘ maruc.
Sce l leva l surëdl à duc po‘ drët gën,
sc’i à da lauré cun diguei o cun fën.
7. Sce l leva l surëdl sun të‘ da Ianon,
ne fej cunedì chëi che giapa l ceston.
Sce l leva l surëdl sun të‘ de Faujëina,
saral da dé ora cestons a desëina.
8. Sce l leva l surëdl, po‘ iel per unì,
sce l flëur po‘ savons che l ie per se n jì.
O mi bon surëdl ne sé cie me ndì,
de nuet uleres pu tu ënghe durmì.
9. Sce l leva l surëdl, po‘ iel per unì,
śën fossel da dì vel‘ de té y de mé:
sce nëus puderon pa levé uni di
o sce la nes toca ncuei da murì.
10. Y l n’ie nia vëira che t’on medrë gën,
canch‘ on da lauré cun diguei o cun fën,
de té an daniëura n vere bujën,
sun chël cëla pu mé de sté for drët bën!
11. Sce l leva l surëdl, à gën i amalei,
l pèr che la nuetes ne fina ades mei.
Sce l leva l surëdl à gën nce i sani,
i ulëssa t’udëi mo magari 100 ani!
12. O mi bon surëdl, nëus duc te mbincion,
cënt an‘ mo de vita y for drët d‘ rion.
O cëla medrë de ne te reviné,
acioche te posses daniëura lavé.
13. Sce l leva l surëdl scumëncia inò n di,
sce l flëur ie njinieda la nuet bel‘ a unì.
Nsci passel via bën prësc duc i dis,
ch‘ Idie nes destineie a jì n paravis.