Coche la va a jì sa mont

Na storia ulëssi ve cunté,
da suinsom nchina japé!

Nsci vala pa bën, canche n ie pa sa mont,
iló iel tan bel y dut va n turont.
La streda ons fat suflan y stentan,
ne ulan tumé ite tl majer pantan.
Vie ju de ch’la dlacia,
tu n’es bën n’acia!
Ne vëijes’a nia, che l pericul te manacia?
Te tomes sun l cul y po’ sbrisces plu lonc,
che n aud stlefan i osc nchin via sun Ronc!

La se tën drët pra sief y scintina dansù,
ie me mpënse che nsci ne vala pa plu.
Te chël mumënt audi crepan y stlefan,
Mariana fova frida a ventrons tl pantan.
Assais d’ù udëi coche la cialova ca,
dut plëina de ciorda y l chitl zarà.
La tlina tl vënt
y ce mel a n tel dënt!
Mé bon che fan ora di uedli dla jënt.

Na cuessa nfleda y ntort la ciavidles,
l mus sprizà su sciche l foss plën de antidles.
La condla dai ueves fova frida ju n ruf,
ne te spioves plu nia, no piz y no cuf.

Ngali sons bën ruvei su,
ma co ne savëssi pa plu!

Giaurì ch’ an la porta, sons ruvei te medel,
l fova tan scur che son frì te cumedel.
Giaurian ora la terles, spanan su ch’i vieresc,
udan la surices firan su per i taieresc.
Sciaudon te furnel, ma ce nibl y ce fum!
Ie ove metù ite massa n gran grum.
Po’ zeri inò ora y sofle sciche n mat,
che stuep y fulim va dut ite tl lat.

La condla che streva y l catl stlupà,
farina deguna y l sach ie zarà.
L ciociul da ranc, i patac ie duc frec,
la cioles ie sëces, i pezi tan stlec.

Fajon na pulënta saleda y da nioch,
ciajuel o zigher ne n’ons nianca n tòch.
Ciaunion y sburdlon ch’la pulënta via y ca,
ti dënz y tl col nes restela ficià.
Ulessan bën da bever, ma ne n’on nia te boza,
la lënga y la ghiela ie suc sciche na tloza.
L’ega dlaceda y l vin ie finà,
pu ma ce spavënt! Ie son dut amalà.

Ne sé sce dësse rì o bradlé,
ma coche la va inant ulëssi cunté.

Mariana, śën spazete, che messon pa mé jì,
sce ulon ruvé a cësa che l ie mo n pue’ di.
Ie scoe, tu leves, po’ ons tosc finà,
po’ jons a cunté tan bel che l ie sta’.
Ie rume y sfrëie che l ie n spavënt,
a udëi ch’l gran stuep y audì l tumblamënt.
L castl dal’ëura ie ju, trat ntëur
y l ciadin dal ciot ie burdlà ju de fëur.

Mariana ti dà bën dassënn cun l lavé,
dut nët y al orden se provela de fé.
La jiefa ti sbriscia śën ora dla man,
pu sacra mantua y ti vedl malan!
La ciga y svëia ch’la mata tumblona!
Y fier cun n jenodl te brëia de curona,
che i goc y la copes ie ju te n mumënt,
assais dassù audì, ce bel stlindernamënt!

Nsci iela stata, ne sé co me n dì,
l ie robes che suzed sun chësc mond uni di.

Ma sa mont iel for bel, po’ dijëde cie che ulëis!
Sce ne sëis mo stac su, po’ iel ëura che jëis!