L giat y l'ëura dal cuch

L fova n iede sun n bel parëi
n’ëura de marueia for da udëi,
ma mpede bater cherc y ëures,
lasciovela fé n cuch chisc lëures.
Per fé si bel mestier po‘ a puntin,
stajovel do la plata a cuzin
y nsci sce l’ëura ne sbaliova,
fajovel uni chert si prova.

L fova n vere gusto a l udëi
giaurian chël pitl usc messëis savëi,
cucuch ciantovel y stlujova,
y jiva inò ulache l fova.
Ma nscila vala bele sun chësc mond,
sce velch va bën y plu che bel mpont,
po‘ vën te n iede velch che sceca
y mile azidënc ne tleca.

Y nscila ti iela jita a nosc cuch:
n di tinjova n giat d’ i dé n druch;
n sbalz sun fëur, po‘ sun curona
a udëi sce l cianta o sce l sona.
Iló fajovel finta d’usservé,
tan bën che l giat savova s’astilé
a fé si moc y si figures
che fova propi dut bravures.

I uedli ovel for medrë sun l usc
y fova atënt a uni pitl tusc;
y śën che l fova iust la cater,
univa l cuch bel pront a bater.
L n’ova mo finà si prim cucuch,
che l giat te n balz i ova da‘ n druch,
y śën scumëncel riesc na viera,
ma te n mumënt ie dut per tiera.

I pëisc de l’ëura ju ados al giat,
y ël sotite jëma śën destrat,
dut ngatià tla ciadineles
ch‘ tira sëura ch’la budeles.

Chësc cajo po‘ servì a tan de jënt
de bel ejëmpl y de nseniamënt,
che chëi che (ti) fej la fossa a n auter,
laite toma nstësc zënzauter.

Dl cuch iel sciot, y l giat fej picià,
scebën che dut l cunst ie revinà,
ma fé la mort al cuch ne d’ovel,
y unì po‘ castigà messovel.